राम कथेतील प्रत्येक पात्र आपल्याला निःस्वार्थ भक्ती आणि एकनिष्ठपणाकडे प्रेरित करतं. स्वयं श्रीरामचंद्र केवळ आपल्या पिताश्रींच्या आदेशानुसार आणि आपल्या धर्माचा आदर करत चौदा वर्षं वनवास स्वीकारतात. फक्त अयोध्या नाही तर अख्खं वन मला भेट मिळत आहे अशी सांत्वना देत प्रभू श्रीराम वनवासास निघाले होते. आजच्या युवा पिढीला ही गोष्ट खूप प्रेरणादायक आहे. आयुष्यात सगळेच निर्णय आणि अमान्य गोष्टी या कुठेतरी आपल्या धर्माला जोडलेल्या असतात. त्यांचा स्वीकार न करत आणि वडीलधाऱ्यांचे निर्णय रद्द करून आपण आपल्याच आयुष्यातल्या ध्येयापासून दुरावतो. अखंड राम कथेत आपण श्रीरामांचं पुरुषोत्तम स्वरूप बघतो. मग ते राजा म्हणून असो, पुत्र, ज्येष्ठ भ्राता, शिष्य, मित्र, पती, मार्गदर्शक किंवा योद्धा म्हणून असो. शत्रूच्या समोर देखील कुठल्याही मर्यादांचे उल्लंघन न करत त्यांनी विजय मिळवला होता. सीतामातेपर्यंत पोहोचायला त्यांना एक वर्षाचा कठोर वनवास झाला होता आणि तत्पश्यात वानर सेनेवर आणि सृष्टीच्या सगळ्या जीवांवर विश्वास ठेवत त्यांनी अन्यायावर आक्रमण केले होते. अनिश्चिततेच्या काळोखात त्यांनी धर्माने आणि सत्याने या जगाला उज्ज्वलित केले होते; त्यांच्या सहिष्णुतेने आणि धैर्याने अहंकारी दशाननाला ही पराजित केले होते. ही गोष्ट आपल्याला खूप काही शिकवून जाते. जर उद्देश्य अटळ आणि योग्य असेल आणि आपण देवावर विश्वास ठेवत प्रयत्न करत राहिलो तर कुठलीच शक्ती आपल्यासमोर मोठी ठरू शकत नाही. विजयानंतर देखील सोन्याच्या लंकेचा यत्किंचितही मोह न ठेवत "जननी जन्मभूमीश्च स्वर्गादपि गरियसी" ह्यास मान्यता देत श्री रामचंद्र अयोध्येस परतले होते. एवढेच नाही तर प्रत्येक जीवाला ते निःस्वार्थ प्रेम आणि करुणा देत आले आहेत. तरुण पिढीने आपले कर्तव्य करणे हीच श्री रामचंद्रांच्या चरणी सेवा ठरेल.

 

राम कथा ही सगळ्यांच्याच त्यागाची आणि अतूट विश्वासाची कथा आहे. रावणाच्या कैदेत अन्न, पाणी आणि निद्रा रहित फक्त रामनामाचा जप करत वाट बघणाऱ्या पतिव्रते सीता मातेची कथा आहे. राज्य सुखांचा मोह सोडून भ्राता धर्म आणि वनवास स्वीकारणाऱ्या लक्ष्मणाची कथा आहे. पिता समान भ्राताला राजा समजून स्वतः निरपेक्षेने संरक्षकाची भूमिका निभावणाऱ्या भरत आणि शत्रुघ्नाची कथा आहे. आत्मसमर्पित रामभक्त हनुमान, बिभीषण, जटायू, सुग्रीव आणि सगळ्याच वानरसेनेची कथा आहे. ही कथा तितकीच रावणाची देखील आहे, जी आपल्याला अहंकार, मोह आणि लोभाच्या वाईट परिणामांचा परिचय करून देते.